Në kërkim për kërcënim me vdekje, arrestohet në Itali 36-vjeçari shqiptar

Policia e Romës ka bërë të mundur arrestimin e një 36-vjeçari shqiptar, i shpallur në kërkim për kanosje për dhënie të pasurisë. Sipas policisë, shqiptari në kërkim ndërkombëtar, para 3 vitesh iu caktua masa arrest në burg, në mungesë. Policia ka bërë me dije se ai 4 vite më parë kërcënoi një shtetas për vdekje, nëse nuk do i jepte 10 mijë euro

“Interpol Tirana/ I shpallur në kërkim ndërkombëtar për veprën penale “Shtrëngimi me anë të kanosjes ose dhunës për dhënien e pasurisë”, ekstradohet nga Italia drejt Shqipërisë, 36-vjeçari.

Falë bashkëpunimit të Interpol Tirana me Interpol Roma/Itali, për lokalizimin dhe kapjen e personave të shpallur në kërkim ndërkombëtar, është bërë i mundur lokalizimi, kapja dhe arrestimi në Itali, me qëllim ekstradimi vendit tonë, i shtetasit shqiptar: B. A., 36 vjeç, banues në Fier.

Ky shtetas ishte shpallur në kërkim, pasi Gjykata e Shkallës së Parë për Krimet e Rënda Tiranë, me vendimin e datës 24.05.2018 i ka caktuar masën e sigurisë “Arrest në burg”, për veprën penale “Shtrëngimi me anë të kanosjes ose dhunës për dhënien e pasurisë”.  

Përmbledhje e ngjarjes së ndodhur: Më datë 24.03.2017, në vendin e quajtur “Sheq i Madh”, Fier, shtetasi B. A. dyshohet se ka shtrënguar me anë të kanosjes ose dhunës, shtetasin E. B., duke e kërcënuar se do ta vriste, nëse ai nuk do t’i jepte brenda dy muajve, shumën 10.000 euro”, njofton policia.