Në kërkim për vrasje mbetur në tentativë, arrestohet në “Shkëmbin e Kavajës” 21-vjeçari me rrezikshmëri të lartë (Emri)

Policia e Durrësit ka arrestuar një 21-vjeçar me rrezikshmëri të lartë shoqërore. Mësohet se i riu Aleksandër Mehmetaj, ishte në kërkim për disa vepra penale, përfshirë vrasje mbetur në tentativë dhe armëmbajtje pa leje.

Durrës/ Vijojnë kontrollet për kapjen e personave në kërkim dhe atyre që lëvizin me armë zjarri me vete, me qëllim rritjen e parametrave të sigurisë. Finalizohet operacioni i koduar "Shkëmbi i Kavajës". Kapet dhe ndalohet një 21-vjeçar me rrezikshmëri të lartë shoqërore, i shpallur në kërkim për veprat penale "Vrasja me dashje e mbetur në tentativë", "Vrasja me paramendim e mbetur në tentativë" dhe "Armëmbajtja pa leje".

Gjatë kontrollit fizik, këtij shtetasi iu gjet një armë zjarri pistoletë. Shërbimet e Stacionit të Policisë Plazh, në bashkëpunim me shërbimet e Komisariatit të Policisë Durrës dhe Forcat “Shqiponja”, në vijim të punës për rritjen e parametrave në qytet, kapjen e personave në kërkim ose atyre që qarkullojnë me armë zjarri me vete, në bazë të informacioneve të mara në rrugë operative, rreth orës 01:30 të ditës së sotme, në lagjen nr. 13, te "Shkëmbi Kavajës", kanë bërë të mundur finalizimin e operacionit policor të koduar "Shkëmbi i Kavajës", si rezultat i të cilit u arrestua në flagrancë shtetasi A. M., 21 vjeç, banues në Durrës. 

Aktualisht, ndaj shtetasit A. M. janë caktuar 2 urdhër-arreste për 2 ngjarje të ndodhura më parë, konkretisht: Për veprat penale "Vrasja me dashje e mbetur në tentativë" dhe "Armëmbajtja pa leje", pasi më datë 02.07.2018, në Durrës, ka plagosur me armë zjarri shtetasin B. G; Për veprat penale "Vrasja me paramendim" e mbetur në tentativë dhe "Armëmbajtja pa leje", pasi  më datë 20.09.2020, në Tiranë, ka plagosur me armë zjarri shtetasin S. B.;

Gjithashtu, për këtë shtetas ishte caktuar dhe urdhër-ndalimi, pasi ishte në kërkim për veprat penale "Drejtim mjeti në mënyrë të parregullt" dhe "Mosbindja nga urdhrit të punonjësit të Policisë".  Gjatë kontrollit fizik ndaj këtij shtetasi, shërbimet e Policisë kanë gjetur dhe sekuestruar në cilësinë e provës materiale një armë zjarri, 5 fishekë dhe 4 aparate celulare.  

Materialet i kaluan Prokurorisë së Rrethit Gjyqësor Durrës, për veprime të mëtejshme”, njofton policia.