Ndryshimet në Kodin Penal, OSBE: Hap i rëndësishëm

Prezenca e OSBE-së në Shqipëri ka reaguar këtë të mërkurë lidhur me ndryshimet në Kodin Penal. OSBE thekson se i mirëpret këto ndryshime dhe se ndryshimet në lidhje me shpifjen janë një hap i rëndësishëm. Më tej theksohet se OSBE inkurajon dekriminalizimin e plotë të shpifjes.

“Prezenca e OSBE-së në Shqipëri mirëpret ndryshimet e fundit në Kodin Penal në lidhje me shpifjen si një hap i parë i rëndësishëm në avancimin e lirisë së shprehjes. Forcimi i mbrojtjes për gazetarët pasqyron një rekomandim të hershëm të OSBE-së.

Ne vazhdojmë të inkurajojmë dekriminalizimin e plotë të shpifjes dhe përdorimin e mjeteve juridike civile proporcionale”, thuhet në reagim.

Me 85 vota pro dhe 9 kundër, Kuvendi miratoi disa ndryshime në Kodin Penal aktual. Kodi i ri penal vazhdon të jetë në proces konsultimi.

Një nga pikat që shkaktoi debat ishte dekriminalizimi i shpifjes, i cili do të aplikohet vetëm për gazetarët. Propozimi i Partisë Demokratike për një dekriminalizim të përgjithshëm për të gjithë qytetarët u rrëzua nga mazhoranca.

Ndryshimet parashikojnë gjithashtu dënim deri në një vit burg për parkimin e mjetit në mes të rrugës, përjashtuar biçikletat dhe motorët.