Ndoqi këmba-këmbës socialisten Iris Luarasi në qendrën tregtare, Arvina Lleshi lihet e lirë pas disa orësh në polici

Aktivistja Arvina Lleshi është lënë e lirë këtë të mërkurë, disa orë pasi ishte shoqëruar në polici gjatë natës.

Ndalimi i saj u krye pas kallëzimit të depozituar nga deputetja e Partisë Socialiste, Iris Luarasi. Episodi që solli ndërhyrjen e policisë kishte ndodhur pranë Kuvendit, ku ligjvënësja po kalonte përmes ambienteve të një qendre tregtare.

Sipas informacioneve të bëra publike, Lleshi e kishte ndjekur deputeten gjatë rrugës drejt institucionit dhe i ishte drejtuar asaj me akuza, duke e quajtur "hajdute".

Lajmi për ndalimin e aktivistes shkaktoi reagimin e mbështetësve të saj. Disa prej tyre u grumbulluan përpara komisariatit ku ajo mbahej, duke kërkuar lirimin e menjëhershëm.

Protestuesit e konsideruan të pajustifikuar veprimin e autoriteteve dhe pretenduan se policia kishte ndërhyrë në mbrojtje të qeverisë. Ata qëndruan jashtë ambienteve të komisariatit deri pas njoftimit për lirimin e Lleshit.