Mot i keq në Vlorë, pezullohet lundrimi detar

Në Vlorë është rikthyer përkeqësimi i kushteve të motit.

Lundrimi detar është pezulluar, pasi Kapiteneria e Portit ka konfirmuar se forca e detit jashtë gjirit të Vlorës arrin 6-7 ballë, ndërsa brenda gjirit deri në 6 ballë, me shpejtësi ere deri në 15-20 m/s dhe lartësi dallgësh nga 1.50 deri në 2.00 metra.

Me qëllim parandalimin e çdo situate të papritur për shkak të kushteve atmosferike, Kapiteneria e Portit ka kërkuar bashkëpunimin e të gjithë subjekteve që ushtrojnë veprimtari në fushën e detarisë, për të marrë të gjitha masat e nevojshme për sigurimin e mjeteve në port dhe për rritjen e gatishmërisë së ekuipazhit në mjetet lundruese.

Mjetet e vogla lundruese dhe anijet e peshkimit nuk mund të dalin deri në një njoftim të dytë. Anijet e transportit ndërkombëtar detar do të vazhdojnë të operojnë normalisht sipas destinacioneve përkatëse.

Sipas Kapitenerisë, pezullimi do të vijojë deri në orën 08:00 të datës 22.12.2024.