Mori përpara me makinë efektivin, arrestohet i riu! Si ndodhi aksidenti në Fresk

Policia e Tiranës ka arrestuar të riun, i cili ditën e djeshme përplasi me makinë një efektiv policie në zonën e Freskut. Përmes një komunikate për mediat, blutë e kryeqytetit kanë zbardhur dhe dinamikën e incidentit.

Sipas policisë, 36-vjeçari i arrestuar ka shfaqur shenja nervozizmi pasi u ndalua nga patrulla e policisë dhe nisi të kundërshtonte forcat e rendit.

Në një moment, ai ka dhënë gaz makinës, duke marrë përpara punonjësin e dëmtuar dhe duke rrezikuar jetën e punonjësve të tjerë të policisë.

Ndaj të ndaluarit u ngrit akuza për “Vrasja e punonjësit të Policisë së Shtetit”, mbetur në tentativë, ndërkohë që materialet procedurale iu referuan Prokurorisë për veprime të mëtejshme.

Komunikata e policisë:
“Rreth orës 17:30, në zonën e Freskut, shërbimet e Komisariatit të Qarkullimit Rrugor, të cilët kanë qenë në shërbim, i kanë bërë shenjë ndalimi automjetit me drejtues shtetasin I. N. (i cili u identifikua më pas).

Pas ndalimit të automjetit, drejtuesi ka shfaqur shenja nervozizmi dhe ka filluar të debatojë dhe të kundërshtojë me fjalë punonjësit e Policisë.

Drejtuesi i automjetit është larguar me shpejtësi me automjet, duke aksidentuar punonjësin e Policisë së Qarkullimit Rrugor, shtetasin A. L., dhe duke rrezikuar jetën e punonjësve të tjerë të Policisë.

Për pasojë, është dëmtuar punonjësi i Policisë A. L., i cili ndodhet në spital, në kujdesin e mjekëve.

Në përfundim të veprimeve, është arrestuar shtetasi I. N., 36 vjeç, banues në Tiranë, për veprën penale “Vrasja e punonjësit të Policisë së Shtetit”, mbetur në tentativë.”