Miliona lekë dhe mijëra paundë të grabitur/ Zbulohen dy rastet e vjedhjeve në Tiranë, në pranga një i ri dhe një grua

Dy operacione të njëpasnjëshme policore janë finalizuar brenda 24 orëve në Tiranë, duke çuar në arrestimin e dy personave të dyshuar për vjedhje me pasoja të rënda.

Sipas njoftimit zyrtar, shërbimet e Komisariatit të Policisë Nr. 2 ndërhynë menjëherë pas kallëzimeve të qytetarëve dhe administratorëve të bizneseve, duke bërë të mundur identifikimin dhe ndalimin e autorëve në kohë rekord.

Në kuadër të operacionit të koduar “The driver”, u arrestua shtetasi L. B., 28 vjeç, i cili dyshohet se për një periudhë prej 6 muajsh ka përvetësuar rreth 3 000 000 lekë. Ai akuzohet se ka shitur për llogari të tij pajisje të subjektit ku ishte i punësuar si shofer, konkretisht pajisje për përpunimin dhe konsumimin e kafesë. Si provë materiale, policia sekuestroi edhe një automjet në pronësi të subjektit, i përdorur për transportin e pajisjeve të vjedhura.

Ndërkohë, në operacionin “Kaseta”, u vu në pranga shtetasja M. Xh., e dyshuar për vjedhjen e 40 000 paundëve. Sipas hetimeve, shuma ishte lënë përkohësisht në kasetën e depozitimit në një market nga një klient, punonjës i një pike këmbimi valutor. Paratë u gjetën në ambientet e subjektit ku punonte e dyshuara dhe u sekuestruan si provë materiale.

Materialet procedurale për të dyja rastet i janë referuar Prokurorisë së Tiranë, e cila do të vijojë me hetimet për zbardhjen e plotë të ngjarjeve.