Lirohet nga burgu pas 4 vitesh, ish-ministri Lefter Koka!

Ish-ministri i Mjedisit, Lefter Koka, është liruar nga burgu pas katër vjetësh arrestimi për lidhjet e tij me aferën e inceneratorëve. Gjykata e Posaçme e Shkallës së Parë për Korrupsionin dhe Krimin e Organizuar (GJKKO) hoqi masën e sigurimit “arrest me burg” për të lidhur me inceneratorin e Fierit.

Në lidhje me inceneratorin e Elbasanit, Koka ka fituar lirinë me kusht nga Gjykata e Durrësit, ndërsa për çështjen e inceneratorit të Tiranës, ai ka shlyer dënimin me kohën që ka kaluar në paraburgim. Për çështjen e inceneratorit të Fierit, Gjykata e Lartë ka kthyer çështjen për rigjykim në Apelin e Durrësit.

Të tre dosjet penale ku Koka ishte i përfshirë, inceneratori i Elbasanit, Tiranës dhe Fierit nuk paraqesin më masa sigurie në fuqi.

Lefter Koka u arrestua në dhjetor 2021 i akuzuar shpërdorim detyre, korrupsion dhe pastrim parash lidhur me aferat korruptive për Inceneratorin e Fierit. Sipas akuzave të SPAK, për inceneratorin e Fierit u paguan 4 milionë euro për punë që nuk u kryen asnjëherë, ndërsa 60 milionë lekë është dëmi i shkaktuar në buxhetin e shtetit në skemën e mashtrimit.