Lirimi i hapësirave publike/ Në Elbasan bizneset nisin të çmontojnë tendat metalike deri më 31 korrik

Në qytetin e Elbasanit ka nisur largimi vullnetar i tendave metalike nga bizneset, si pjesë e fushatës kombëtare të ndërmarrë nga Inspektorati Kombëtar i Mbrojtjes së Territorit (IKMT), që synon lirimin e hapësirave publike nga ndërtimet pa leje.

Pa praninë e inspektorëve apo policisë bashkiake në terren, shumë biznese përgjatë bulevardit qendror kanë nisur të heqin vetë strukturat metalike.

IKMT ka vendosur si afat për përfundimin e këtij procesi datën 31 korrik, pas së cilës do të ndërhyjë drejtpërdrejt në rast të moszbatimit.

Ndërkohë, pronarët e bizneseve shprehin shqetësimin për pasojat që kjo nismë mund të ketë në aktivitetin e tyre dhe në vendet e punës. Ata presin një plan të qartë riorganizimi të hapësirave dhe zgjidhje alternative për të vijuar shërbimin.