Lëvizja e fundit në Kuvend për ndërtimet pa leje, jepet paralajmërimi: Keni 6 muaj kohë

Qeveria ka depozituar në Kuvend ndryshimet në ligjin për administrimin e objekteve të konfiskuara si ndërtime pa leje, duke propozuar një skemë të re për administrimin, zhvillimin, shitjen dhe përdorimin e tyre.

Projektligji ndryshon ligjin nr.66/2023 dhe parashikon që kompetencat për administrimin e këtyre pasurive të përqendrohen te Agjencia e Administrimit të Pasurive të Sekuestruara dhe të Konfiskuara, AAPSK.

Ky projektligji përbëhet nga 26 nene. Sipas relacionit të dorëzuar tashmë në Kuvendin e Shqipërisë, një nga problematikat e evidentuara gjatë zbatimit të ligjit aktual ka qenë ndarja e vendimmarrjes mes Komisionit të Objekteve të Konfiskuara, ministrisë përgjegjëse dhe strukturave të tjera. Qeveria argumenton se kjo ka sjellë vonesa në administrim, amortizim të objekteve dhe mbivendosje kompetencash.

Me ndryshimet e propozuara, Komisioni i Objekteve të Konfiskuara hiqet, ndërsa AAPSK (Agjencia e Administrimit të Pasurive të Sekuestruara dhe Konfiskuara) përcaktohet si institucioni përgjegjës për administrimin dhe zhvillimin e objekteve të konfiskuara.

Një tjetër ndryshim lidhet me objektet e konfiskuara ku investimi ka mbetur i papërfunduar. Projektligji parashikon procedura për vlerësimin e tyre, përcaktimin e kostove të punimeve që kanë mbetur dhe përgjegjësitë e subjekteve zhvilluese.

Për përfundimin e këtyre ndërtimeve, operatorët ekonomikë do të përzgjidhen përmes procedurave të prokurimit publik. Autoriteti kontraktor që do të realizojë prokurimin, mbikëqyrjen, përfundimin dhe kolaudimin e punimeve do të caktohet rast pas rasti me vendim të Këshillit të Ministrave.

Objektet e konfiskuara mund të përdoren edhe për strehim social ose për interes publik. Projektligji përcakton procedurat për kalimin e tyre në pronësi, përdorim apo administrim të institucioneve publike dhe njësive të vetëqeverisjes vendore.

Ndryshimet prekin edhe pronarët e truallit dhe personat e tretë që kanë marrëdhënie kontraktuale me subjektet ndërtuese. Për personat e tretë parashikohet njohja e marrëdhënieve kontraktuale, procedura për kompensimin financiar, trajtimi i kontratave të kleringut dhe mundësia e pjesëmarrjes në procedurat e shitjes së objekteve të konfiskuara.

Projektligji përcakton gjithashtu përgjegjësi ligjore dhe financiare për subjektet zhvilluese, zbatuese, mbikëqyrëse ose kolauduese edhe pas konfiskimit të objektit, përfshirë detyrimet që lidhen me përfundimin e punimeve të mbetura.

Një tjetër pikë e projektligjit është krijimi i një fondi të posaçëm për ndërtimet pa leje. Ky fond do të përdoret për financimin e proceseve të administrimit dhe zhvillimit të objekteve, përfundimin e punimeve, vlerësimet teknike dhe shlyerjen e detyrimeve ndaj personave të tretë. Sipas relacionit, ndryshimet nuk parashikohet të sjellin efekte financiare shtesë për buxhetin e shtetit.

6 muaj afat për vetëdeklarimin

Një nga nenet që tërheq vëmendjen në projektligj është neni 23, i cili hap një periudhë tranzitore 6-mujore për vetëdeklarimin e ndërtimeve pa leje.

Sipas relacionit, subjektet poseduese që deklarojnë me vullnetin e tyre pranë Agjencisë së Zhvillimit të Territorit (AZHT) objektet e ndërtuara pa leje, brenda 6 muajve nga hyrja në fuqi e ligjit, do të përfitojnë të drejtën e parablerjes dhe do të kenë mundësi t’u nënshtrohen procedurave përkatëse.

“Neni 23 i projektligjit parashikon shtimin e neneve 30/1 dhe 30/2, në ligjin në fuqi, ku neni 30/1 vendos dispozita kalimtare për transferimin pranë AAPSK-së të dosjeve, dokumentacionit dhe fondit të konfiskimit të administruar nga strukturat ekzistuese. Gjithashtu, parashikon se subjektet poseduese, të cilët deklarojnë me vullnetin e tyre objektet e ndërtuara pa leje, pranë organit kompetent (AZHT), brenda 6 muajve nga data e hyrjes në fuqi të këtij ligji, do t’i njihet e drejta e parablerjes dhe do të kenë mundësi t’i nënshtrohen procedurave përkatëse”, thuhet në relacionin shoqërues të projektligjit.

I njëjti nen përcakton edhe mënyrën se si do të trajtohen objektet që janë konfiskuar përpara hyrjes në fuqi të ndryshimeve. Për këto objekte parashikohet zbatimi i procedurave të reja administrative, duke ruajtur të drejtat e parablerjes që janë krijuar sipas ligjit të mëparshëm.

Ndryshimet parashikojnë gjithashtu krijimin e një regjistri transparent të objekteve të konfiskuara, ndërsa AAPSK do të ketë kompetenca për administrimin, zhvillimin, shitjen dhe monitorimin e tyre.