LAJM I FUNDIT/ Policia arreston të miturin që vrau 15-vjeçarin pranë shkollës “Fan Noli”

Një ditë pas vrasjes me thikë në zemër të 14-vjeçarit Martin Cani, pranë shkollës “Fan Noli” në Tiranë,  është arrestuar autori.

Autori Marin Ll. Është arrestuar në rrugën “Qemal Stafa”, pak metra larg shkollës 9-vjeçare ku ndodhi ngjarja tragjike.

Burime për media bëjnë me dije se autori Marin Ll., ditën e djeshme ndodhej në spital privat për trajtim pasi mori një plagë në dorën e majtë.

Autori 14-vjeçar dyshohet se pas përplasjes së dhunshme me thika, ku qëlloi disa herë bashkëmoshatarin është larguar pranë një parku, e më pas ka shkuar në një spital privat. Ndërsa u publikua edhe një foto, ku shihet dora e gjakos e autorit. Dyshohet se ai e ka fotografuar dhe dërguar disa shokëve të tij pas ngjarjes.

Njoftimi:

Në vijim të veprimeve hetimore dhe procedurale të kryera në lidhje me ngjarjen e ndodhur ditën e djeshme, në rrugën “Qemal Stafa”, specialistët e Seksionit për Hetimin e Krimeve Ndaj Personit arrestuan një të mitur 14 vjeç, për veprat penale “Vrasja me dashje e kryer ndaj të miturit” dhe “Prodhimi, mbajtja, blerja apo shitja pa leje e armëve të ftohta”, parashikuar nga nenet 79 pika a dhe 279 të Kodit Penal.

Ky shtetas, ditën e djeshme, në afërsi të shkollës “Fan Noli”, për motive të dobëta është konfliktuar me dy bashkëmoshatatët e tij dhe gjatë konfliktit i ka goditur ato me mjet prerës. Gjatë konfliktit janë dëmtuar të 3 të miturit.

Si pasojë e plagëve të marra njëri nga 14-vjeçarët ka ndërruar jetë në spital, ndërsa tjetri, së bashku me autorin e dyshuar ndodhen jashtë rrezikut për jetën.

Materialet i kaluan Prokurorisë.