Kukës, vijon pastrimi i akseve rrugore nga dëbora në zonat e thella malore

Në bashkinë e Kukësit vijon puna për pastrimin e rrugëve nga dëbora në disa fshatra.

Ekipet e Drejtorisë së Rrugëve Rurale dhe e Drejtorisë së Emergjencave, vijojnë të jenë në terren dhe kanë bërë të mundur pastrimin e rrugës nga bora në fshatin Tejdrine dhe Lusën, njësia administrative Ujmisht, si dhe në fshatin Orçikël, njësia Zapod, me qëllim lehtësimin e lëvizjes së banorëve dhe të automjeteve.

Bashkia e Kukësit bën të ditur se “puna vijon pandërprerë ditë dhe natë, për ndërhyrjen dhe zhbllokimin e të gjitha akseve rrugore në zonat e thella malore”.

Javën që kaloi i gjithë territori i Kukësit u përfshi nga reshje bore me intensitet mesatar. Nga subjektet kontraktore u realizua puna për pastrimin e rrugëve nga bora dhe kriposjen e tyre.