Konflikti midis mjekëve në spitalin e Fierit, policia njoftim zyrtar: Është zgjidhur me mirëkuptim mes palëve!

Policia e Fierit ka bërë një njoftim në lidhje me një lajm se ishte plagosur një mjek në spitalin memorial.

Në njoftimin e bërë, policia sqaron se pas verifikimeve të kryera ka rezultuar të ketë pasur konflikt verbal në ambientet e spitalit mes dy personave, staf në spital.

Konflikt që, sipas policisë, është zgjidhur me mirëkuptim mes dy personave të përfshirë.

Njoftimi i policisë

Në lidhje me një lajm të publikuar në rrjete sociale, sipas të cilit është plagosur me mjet prerës (thikë), një mjek në Spitalin Memorial Fier, sqarojmë se:

Menjëherë pas marrjes së njoftimit, shërbimet e Policisë kanë shkuar në ambientet e spitalit, ku nga verifikimet e kryera, ka rezultuar se nuk kishte ndodhur plagosje me mjet prerës (thikë).  

Shtetasi J. M., mjek i spitalit dhe shtetasi L. B., punonjës i spitalit kanë patur një konflikt verbal në ambientet e spitalit, për të cilin kanë deklaruar se e kanë zgjidhur me mirëkuptim. 

Drejtoria Vendore e Policisë Fier vijon veprimet procedurale për verifikimin e plotë të rrethanave të rastit.