"KLGJ i del para qeverisë dhe Kuvendit: Votimi unanim përcakton rritjen e pagave për gjyqtarët dhe prokurorët"

Këshilli i Lartë Gjyqësor i ka paraprirë Kuvendit duke marrë vetë në dorë zbatimin e vendimit të Gjykatës Kushtetuese për llogaritjen e pagave të trupës gjyqësore.

Në mbledhjen e kësaj të mërkure, 11 anëtarët e KLGJ-së votuan në mënyrë unanime për përcaktimin e pagës referuese bazë për magjistratët, duke zgjidhur pasigurinë financiare në të cilën ndodhej pushteti gjyqësor prej muajsh.

Mësohet se, sipas vendimmarrjes së re, e cila detyron Ministrinë e Financave të sigurojë mbulimin e nevojshëm buxhetor, paga bazë e gjyqtarëve nga 1 gushti 2026 e në vazhdim do të llogaritet mbi kategorinë e lartë drejtuese.

Ajo përbëhet nga paga e pozicionit prej 222,425 lekësh, si dhe shtesa e nivelit të kualifikimit prej 14,000 lekësh.

Përveç përcaktimit të pagës së re, ky vendim ka edhe efekt prapaveprues. KLGJ ka ngarkuar Departamentin e Buxhetit dhe njësitë përgjegjëse në gjykatat e të tri niveleve të përllogarisin me shpejtësi të gjithë efektin financiar të rillogaritjes së pagave për të gjitha funksionet gjyqësore për periudhën nga 1 prilli i vitit 2023 deri më 31 korrik 2026.