KLGJ e KLP caktuan vetë pagat e sistemit të drejtësisë, qeveria "ngrin" rrogat e gushtit për magjistratët

Pasi KLGJ e KLP i caktuan vetë pagat e sistemit të drejtësisë, qeveria është vënë në lëvizje dhe i ka bllokuar pagat në Thesarin e Shtetit.

Burime ekskluzive për Report Tv bëjnë me dije se Thesari i Shtetit ka bllokuar pagat e muajit gusht për të gjithë magjistratët.

KLGJ ndërhyri  për të zgjidhur ngërçin e pagave të gjyqtarëve, pasi Kuvendi nuk miratoi një ligj brenda 31 korrikut për të zbatuar një vendim të Gjykatës Kushtetuese.

Nga 1 gushti, paga referuese do të jetë 222 mijë e 425 lekë, nga 156.800 lekë që ishte më herët, plus shtesa e nivelit të kualifikimit 14.000 lekë. 

Po ashtu, u miratua edhe propozimi për kompesimin e rritjes së munguar nga data 1 prill 2023 deri më 31 korrik të këtij viti.

Mbi këtë vendim, gazetari i Report TV Isa Myzyraj kërkoi një reagim nga Qeveria. Në përgjigje të kësaj kërkese, Qeveria dha këtë reagim:

“Kjo është një çështje delikate që kërkon fillimisht një analizë të brendshme dhe sapo të merret një vendim lidhur me këtë do t’ju mbajmë të informuar.” - thuhet në reagimin e Qeverisë.

Çështja e pagave të magjistratëve, është shoqëruar me një përplasje të gjatë gjyqësore në Gjykatën Kushtetuese mes gjyqtarëve/prokurorëve dhe qeverisë, që nga viti 2023./Shqiptarja/