I shpallur në kërkim ndërkombëtar për drogë, arrestohet në Qafë- Thanë 39-vjeçari shqiptar, do ekstradohet në Brazil (Emri)

Është arrestuar në Qafë- Thanë, 39-vjeçari Faton Vinça, i shpallur në kërkim ndërkombëtar për trafikim të narkotikëve. Mësohet se i riu kërkohet nga Brazili, dhe pritet të ekstradohet drejt shtetit amerikano-jugor. 

"Si rezultat i shkëmbimit të vazhdueshëm të informacioneve mes ZQK Interpol Tirana, në hyrje të Republikës së Shqipërisë, është bërë i mundur arrestimi me qëllim ekstradimi drejt Brazilit të shtetasit F. V., 39 vjeç, banues në fshatin Veleshte, Strugë, Maqedonia e Veriut. Gjykata e Gjashtë Federale Penale Rio de Janeiro, më datë 27.11.2019, ka lëshuar urdhër arresti për këtë shtetas, për veprën penale “Trafikimi i narkotikëve”. Veprimet procedurale u kryen nga specialistët për Hetimin e Krimeve në Komisariatin e Policisë Pogradec", thuhet në njoftimin e policisë. Interpol Tirana vijon procedurat për ekstradimin e tij drejt Brazilit.