Humbën jetën në aksident në Lezhë, 52-vjeçari shërbente si shef shëndetësie në burg! E bija 20-vjeçare studionte për Mjekësi

Detaje të reja janë bërë publike nga aksidenti tragjik i ndodhur mbrëmjen e së shtunës në Lezhë, ku humbën jetën babë e bijë, Anton dhe Bora Keçi.

Drejtoria e Burgjeve ka reaguar me një mesazh ngushëllimi, ku bën me dije se 52-vjeçari ishte shef i Shëndetësisë në IEVP Lezhë, ndërsa vajza e tij 20-vjeçare ishte studente në vitin e dytë të Fakultetit të Mjekësisë, duke ndjekur të njëjtën rrugë profesionale si i ati.

Sipas njoftimit zyrtar, aksidenti ndodhi më 25 prill 2026, në orët e mbrëmjes, në aksin Lezhë-Gjadër, në vendin e quajtur Gocaj, ku automjeti me të cilin udhëtonin doli nga rruga, duke u marrë jetën të dyve.

“Dr. Anton Keçi shërbeu me përkushtim për rreth 6 vite në sistemin penitenciar, duke lënë pas vlerësim profesional dhe njerëzor tek kolegët dhe të gjithë ata që e njohën”, thuhet në reagim.

Institucioni shprehu ngushëllime për familjarët, ndërsa theksoi se pranë dhimbjes së madhe mbeten bashkëshortja dhe djali i viktimës.

Mësohet se babë e bijë punonin gjithashtu me kohë të pjesshme në kampin e refugjatëve në Gjadër.