Fotoja që po bën xhiron e rrjetit/ Rama takohet me Alex Soros në Dhërmi

Prej disa ditësh ishte përfolur se gjatë pushimeve në jug të vendit, kryeministri i vendit Edi Rama ishte takuar me Alex Soros, djalin e miliarderit George Soros.

Fillimisht në rrjet qarkulloi një foto e paqartë e një gomoneje, e cila u lidh me lëvizjet e Ramës dhe Soros gjatë qëndrimit të tyre në jug. Tashmë, një tjetër foto e publikuar në rrjet pretendohet se tregon takimin mes kryeministrit Rama dhe Alex Soros.

Sipas informacioneve të siguruara, takimi është zhvilluar gjatë një darke në një prej restoranteve të Dhërmiut.

Takimi Rama–Soros tërheq vëmendje edhe për shkak të marrëdhënieve që kryeministri shqiptar ka krijuar vitet e fundit me rrethin politik të Donald Trump, ndërsa Alex Soros dhe rrjeti i tij janë konsideruar prej kohësh në krahun e kundërt të përplasjes politike me ish-presidentin amerikan.

Në këtë kontekst, interes të veçantë merr edhe një deklaratë e bërë më herët nga Rama, i cili, duke iu referuar protestave të zhvilluara në Shqipëri, deklaroi se ato mbështeteshin edhe nga “armiq të Trump”, duke iu referuar, ndër të tjera, rrjetit të Soros.

Takimi në Dhërmi vjen në një moment kur pozicionimi ndërkombëtar i Ramës dhe marrëdhëniet e tij me aktorë të ndryshëm politikë në SHBA vijojnë të tërheqin vëmendje.