Fotografuan Ergys Agasin në makinën e policisë, pezullohen nga detyra dy efektivët e “Shqiponjave”

Fotografuan ish-drejtorin Ulian Shpataraku në dhomat e shoqërimit, pezullohen dy efektivë të “Shqiponjave”.

Bëhet fjalë për këtë foto të siguruar nga “Ora News”, e cila mesa duket shkrepja e saj tashmë u ka kushtuar dy efektivëve vendin e punës.

ARRESTIMET DHE HETIMI I AMP-së

Pas javësh ndjekje, Forcat Operacionale të Policisë së Shtetit, në bashkëpunim me Byronë Kombëtare të Hetimit, vunë në pranga Ergys Agasin, i shpallur në kërkim nga SPAK në kuadër të hetimeve për çështjen e lidhur me Agjencinë Kombëtare të Shoqërisë së Informacionit.

Pas arrestimit, si Policia e Shtetit, ashtu edhe SPAK, reaguan zyrtarisht përmes njoftimeve për mediat, duke publikuar pamje dhe të dhëna lidhur me operacionin.

Në këto komunikime u respektuan standardet e vendosura prej vitesh për prezumimin e pafajësisë së personave nën hetim, ndërsa identiteti u paraqit me iniciale dhe fytyra u mbulua.

Respektimi i këtyre standardeve lidhet edhe me detyrimet që burojnë nga legjislacioni për mbrojtjen e të dhënave personale. Por ajo që pasoi më vonë, nuk vijoi sipas të njëjtave standarde.

Në media u bënë virale fotografi të Ergys Agasit, të shkrepura brenda automjetit të Policisë, gjatë transportimit të tij nga Durrësi drejt Tiranës. Fotografi të tjera të tij u publikuan edhe nga ambientet e shoqërimit në Drejtorinë Vendore të Policisë së Tiranës.

Publikimi i këtyre fotove ngre pikëpyetje mbi respektimin e rregullave për aksesin, administrimin dhe përpunimin e të dhënave personale, si edhe mbi detyrimin e punonjësve të Policisë për ruajtjen e konfidencialitetit.

Pikërisht për këtë arsye, këtë të enjte, Agjencia e Mbikëqyrjes Policore nisi një hetim administrativ, me qëllim identifikimin e personave që kanë realizuar dhe shpërndarë fotografitë e të arrestuarit.

Grupet e hetimit të AMP-së kryen verifikime lidhur me punonjësit e Policisë Tiranë, me fokus te mënyra se si janë realizuar, aksesuar dhe nxjerrë jashtë strukturave policore këto pamje.

Në përfundim të verifikimeve, Agjencia e Mbikëqyrjes Policore pritet të reagojë zyrtarisht për rastin dhe të bëjë me dije rezultatet e hetimit administrativ.