Dhunoi rëndë partneren e tij shtatzënë, arrestohet shqiptari në Serbi (EMRI)

Klejvis Metalla, një 24-vjeçar shqiptar, është kapur në Serbi pasi u shpall në kërkim ndërkombëtar për dhunën e ushtruar ndaj bashkëjetueses së tij shtatzënë në janar të këtij viti.

Metalla, i cili ishte akuzuar për “plagosje të rëndë me dashje”, kishte sulmuar rëndë gruan e tij gjatë një incidenti në fillim të vitit 2025. Për këtë ngjarje, ai kishte marrë masën e sigurisë “Arrest në burg” nga Gjykata e Dibrës në mars të vitit 2025.

Pas arrestimit të tij në Serbi, autoritetet shqiptare kanë nisur procedurat për ekstradimin e 24-vjeçarit, në mënyrë që ai të përballet me drejtësinë në Shqipëri.

Njoftimi i plotë;

Vijon operacioni policor ndërkombëtar, i koduar “The Wanted”.

Në janar të vitit 2025, dhunoi rëndë bashkëjetuesen e tij shtatzënë, lokalizohet dhe kapet në Serbi, me qëllim ekstradimin në Shqipëri, 24-vjeçari.

Në vijim të bashkëpunimit ndërmjet specialistëve të Interpol Tiranës dhe specialistëve të Interpol Beogradit, u arrestua provizorisht në Serbi, në vijim të operacionit “The Wanted”, shtetasi shqiptar, K. M., 24 vjeç.

Ai ishte shpallur në kërkim ndërkombëtar, pasi në muajin mars 2025, Gjykata e Dibrës i caktoi masën e sigurisë “Arrest në burg”, për veprën penale “Plagosja e rëndë me dashje”.

24-vjeçari akuzohet se në muajin janar 2025, dhunoi rëndë bashkëjetuesen e tij shtatzënë.

Vijon bashkëpunimi ndërmjet strukturave policore, me qëllim ekstradimin e 24-vjeçarit, në Shqipëri.