EMRAT/ Kërcënuan me armë 44-vjeçarin, Gjykata e Durrësit lë në burg dy prej të arrestuarve

Gjykata e Durrësit ka vendosur masën e sigurisë për tre shtetasit e arrestuar gjatë operacionit policor “Intervention”, ndërmarrë tre ditë më parë, teksa po përgatiteshin për të kryer një ngjarje kriminale.

Për shtetasit Bajram Roçi dhe Bekim Çera, gjykata ka caktuar masën e sigurisë “Arrest në burg,” ndërsa Ylli Murati është vendosur në “Arrest shtëpie.” Prokurori i çështjes, Gëzim Veizi, ka kërkuar masa të njëjta sigurie: “Arrest në burg” për Roçin dhe Çerën, dhe “Arrest shtëpie” për Muratin.

Të tre shtetasit akuzohen se, për motive të dobëta, kanosën me armë zjarri një 44-vjeçar në zonën e Plazhit. Policia e Durrësit ndërhyri mbrëmjen e së hënës, pas një njoftimi për rastin e kanosjes në rrugën “Pavarësia,” duke arrestuar autorët në flagrancë.

Gjatë kontrollit të automjetit të blinduar tip Lancia, në pronësi të 40-vjeçarit Ylli Murati, policia gjeti dy armë zjarri (kallashnikov dhe pistoletë), si dhe një radio të lidhur me kanalet e komunikimit të DVP Durrës. Ndërkohë, në shtëpinë e babait të Bajram Roçit, u sekuestrua një pistoletë.