Ish-polici i burgjeve Gentjan Bejtja vritet në oborrin e banesës, i shpëtoi tri atentateve

Ish polici i burgjeve Gentian Bejtja është ekzekutuar ditën e sotme në banesën e tij në Larushk të Fushë-Krujës. Viktima eshte person me precedent te shumte penale dhe i ka shpetuar tri atentateve. 

Policia lokale e Krujes, njoftoi se pak minuta pas ngjarjes, në afërsi të banesës së tij në Fushë-Krujë, është gjetur i djegur një automjet. Policia po heton nese eshte perdorur nga autoret e krimit. 

Krujë/Informacion paraprak

Më datë 15.03.2024, në fshatin Larushk, Krujë, nga persona ende të paidentifikuar është vrarë me armë zjarri shtetasi G. B.

Një grup i posaçëm hetimor, nën drejtimin e Prokurorisë, vazhdon punën për sqarimin e rrethanave të ngjarjes, identifikimin dhe kapjen e autorëve të dyshuar.

Burime për mediat bëjnë me dije se Bejtja është qëlluar ne armë zjarri sapo ka shkelur në oborrin e banesës së tij. Ende nuk dihen detajet e ngjarjes apo kush janë autorët e krimit të rëndë, por Bejtja ka qenë shënjeshtër e atentatit në Krujë gjatë verës së 2023, duke i shpëtuar plumbave.

Ish-polici kishte shpëtuar disa herë atentateve, ku në vitin 2022, ndaj tij është qëlluar me breshëri kallashnikovi teksa lëvizte me makinë në zonën e Niklës, i shoqëruar nga Klodian Stafuka.

Asokohe Gentian Bejtja mbeti i plagosur. Po ashtu i ka shpëtuar edhe në 2016 një tjetër atentati me eksploziv në makinë, ku edhe në atë kohë mbeti i dëmtuar.

Bejtja rezulton person me precedentë penalë të mëparshëm në fushën e veprave penale në krime kundër personit dhe pronës, si dhe i arrestuar me arsenal armësh në banesë.

Bejtja njihet si miku i ngushtë i Enver Stafukës, personazh i njohur i botës së krimit, i rrëmbyer nga një skuadër “policore” dhe i zhdukur në rrethana të dyshimta në shkurt të vitit 2015.

Por kush është Gentjan Bejtja?

Ai është një emër i njohur për policinë, pasi së bashku me Enver Stafukën, ishin personat që vodhën makinën e përdorur për vrasjen e kryekomisar Dritan Lamajt në shkurt të vitit 2013. Të dy u arrestuan nga policia një ditë pas vrasjes së kryekomisarit. Gjithashtu, ish-polici Bejtja i ka shpëtuar edhe një atentati me minë të telekomanduar në vitin 2016, ndërsa ka edhe precedentë penalë në krimet ndaj pronës.

Me 4 korrik 2023 Gentian Bejtja, i shpëtoi për herë të tretë atentatit, ndërsa mbeti i vrarë kunati i tij Ramazan Sino (vëllai i gruas) dhe u  plagosën dy djemtë e mitur. 

Atentati ndodhi rreth orës 00:15 të 4 korrikut 2023, në oborrin e banesës së Gentian Bejtjas në fshatin Larushk, 20 km larg qytetit të Krujës. Ndërsa Valter Bami u arrestua dy ditë më pas, 6 korrik 2023 pasi në dorën e majtë të Bamit u konstatuan mbetje baruti.