Ekzekutimi i efektivit të "Shqiponjave" në Fier, eksperti zbardh detaje: Është gjetur një telefon

Eksperti i Sigurisë, Fatjon Softa, është shprehur se autori i dyshuar për vrasjen e efektivit të “Shqiponjave” në Fier, Novruz Cenaliajt, mund të ketë shkuar në drejtim të Vlorës ose të Tepelenës, megjithëse sipas tij asgjë nuk është e vërtetuar.

Komentet Softa i bëri në një studio televizive, ku tha se autori i dyshuar Azgan Mërnica mund edhe të jetë fshehur në një zonë të afërt me shtëpinë e tij, ndoshta në një banesë tjetër.

Softa tha gjithashtu se raportohet se është gjetur edhe një telefon, por që nuk dihet ende nëse i përket autorit apo viktimës.

Ai tha se nëse është i autorit, pasi të zbulohen thirrjet, do të shihet nëse autori ka kërkuar ndihmë nga persona të cilët i njeh, për t’u arratisur.

“Nuk kemi forca të ndërhyrjes së shpejtë të dislokuara nëpër qarqe. Dhe këto vonesa sigurisht ndikojnë. Kemi ngritjen e postblloqeve, që janë të ngritura nga shërbimet e Policisë, sa herë kemi pasur ngjarje, por në asnjë rast nuk kanë qenë efektive. Sa herë kemi pasur atentat e kemi provuar që nuk kanë funksionuar. Edhe pse nuk e kishim të identifikuar autorin, përsëri kemi gjetur vetëm mjetin që është djegur dhe personat janë larguar.

Nuk është se është rasti i tillë, pasi kemi identifikim të personit dhe drejtimin ku mund të ketë shkuar. Së pari duhet të verifikojmë atë që thonë se është gjetur një telefon, por nuk dihet nëse është i viktimës apo i autorit. Duhet të shikojmë edhe thirrjet telefonike, sepse me siguri personi duhet të ketë kërkuar ndihmë dhe mund të jetë ndihmuar edhe nga personat të cilët i njeh.

Mund të jenë edhe strehime, nuk është e thënë të ketë shkuar në një territor shumë të largët. Policia duhet të ketë edhe një forcë lëvizëse siç janë helikopterët. Mundësia e mbajtjes së zonave ku ai mund të depërtojë, është e mundur. Por thamë janë drejtimi i Tepelenës, i Vlorës apo drejtime të tjerë dhe nuk e dimë ku mund të ketë ikur”, tha Softa.