E vrau dhe e dogji të dashurën/ Selmani pranon krimin: “Dehej dhe më godiste, por e duroja sepse e doja”

Një ngjarje e rëndë tronditi Pogradecin, një 52-vjeçare u vra brutalisht nga partneri i saj, i cili më pas i vuri flakën trupit për të zhdukur provat.

Autori, Ilirjan Selmani, 31 vjeç, u arrestua nga policia pak orë pas krimit, pasi u identifikua nga kamerat e sigurisë pranë banesës së viktimës, Kozeta Teço.

Gjatë marrjes në pyetje, Selmani pranoi krimin dhe dha versionin e tij për marrëdhënien me viktimën. “E doja, nuk më bënte përshtypje mosha. Ajo shpesh dehej dhe më godiste, por e duroja sepse e doja. Pastaj nuk durova dot më”, u shpreh ai.

Sipas deklarimeve të 31-vjeçarit, lidhja mes tyre kishte tre vite, por kohët e fundit ishte tensionuar, pasi sipas tij, viktima vuante nga probleme të shëndetit mendor dhe ushtronte dhunë.

Krimi ndodhi pas një konflikti të çastit në banesën e Kozetës. Selmani e goditi me thikë dhe më pas dogji trupin e saj në përpjekje për të humbur gjurmët. Policia ka nisur hetimet për të zbardhur plotësisht rrethanat, ndërsa ndaj autorit rëndon akuza e vrasjes me paramendim dhe fshehjes së provave.