Bllokimi i aksit Librazhd-Prrenjas/ Kreu i ARRSH: U vendos ndërtimi i një rruge të re alternative dhe prishja e urës

Kreu i Autoritetit Rrugor Shqiptar, Ami Kozeli njoftoi sot përmes një konference për shtyp se do të ndërtohet një rrugë e re përgjatë hekurudhës në shtratin e lumit Shkumbin, pas bllokimit të aksit Librazhd-Prrenjas.

Po ashtu, është vendosur shembja e urës aktuale, e cila është jashtë funksionit për shkak të rrëshqitje të dherave. Si shkaqe të prishjes së rrugës, kreu i ARRSH renditi reshjet e dendura si dhe erozionin lumor.

“Nga analiza e situatës, rezulton se shkaku kryesor është ndikimi i reshjeve intensive, erozioni lumor dhe saturimi i masivit të tokës, që ka sjellë pamundësi për ndërhyrje të menjëhershme.

Në mbledhjen e sotme në Këshillin Teknik u morën këto vendime:

Ndërtimi i një rruge të re alternative përgjatë hekurudhës në shtratin e lumit Shkumbin për të mundësuar kalimin deri në stabilizimin e plotë të rrëshqitjes. Rakordimi me Hekurudhën Shqiptare për realizimin e kësaj rruge. Prishja e urës ekzistuese, tashmë jashtë funksionit, si dhe sistemimi dhe disiplinimi i ujërave në të gjithë zonën”, u shpreh kreu i ARRSH./TCH