Del ekspertiza: Si tre efektivët e “Shqiponjave” qëlluan me armë makinën e qytetarit

Është zbardhur ekspertiza paraprake lidhur me ngjarjen e 3 efektivëve të forcave “Shqiponja” që kanë qëlluar me armë një automjet të tipit “Audi” në aksin Tiranë – Fushë Krujë.

Ngjarja ka ndodhur në 8 mars të këtij viti por efektivët e kanë fshehur ngjarjen e cila është zbuluar vetëm dy javë më parë.

Nga kqyrja e provave rezulton se plumbi që është qëlluar makina, ka dalë nga arma e shërbimit të efektivit Rezart Berberi, tashmë i shpallur në kërkim.

Gjithashtu dyshohet se drejt makinës mund të jetë qëlluar dhe nga dy efektivët e tjerë që kanë qenë sëbashku me Berberin, por gëzhoja është e dëmtuar dhe nuk mund të verifikohet.

Lidhur me ngjarjen, policia ka shpallur në kërkim që nga 24 shtatori Rezart Berberin dhe ka proceduar në gjendje të lirë dy efektivët e tjerë, Elton Dokollari dhe Fliruan Zeneli, në masën detyrim paraqitje, të cilët janë pezulluar nga puna.

Në makinë janë konstatur 6 vrima që dyshohet të jenë shkaktuar nga 3 plumba. Shtetasi ka bërë denoncimin në prokurori duke thënë se u ndalua nga efektivët për kontroll dokumentash. Ai vijon duke thënë se i ka dhënë dokumentacion e nevojshëm dhe ka kërkuar të largohet sepse kishte djalin në spital, fakt ky i verifikuar nga grupi hetimor.

Referuar dëshmisë së shtetasit, ai thonë se në këto momente njëri nga efektivët i drejton armën dhe i kërkon të zbresë nga automjeti pasi dyshonte se kishte armë në makinë. Ai pretendon se ka pranuar të zbresë nga makina por ka kërkuar të mos i drejtohet arma dhe më pas i ka dhënë gaz makinës dhe është larguar nga vendngjarja.

Efektivët e kanë qëlluar me armë por nuk kanë bërë kallëzim të plotë në polici. Ata kanë dëshmuar për një shtetas i cili nuk i është bindur urdhërave të policisë dhe është larguar nga vendi i ngjarjes, por kanë fshehur faktin që kanë qëlluar me armë drejt tij.

34 vjeçari Rezart Berberi është i shpallur në kërkim, ndërsa Elton Dokollari 46 vjeç dhe Fliruan Zeneli 37 vjeç, janë nën masën detyrim paraqitje, të dyshuar për shpërdorim detyre, moskallëzim krimi dhe veprime që pengojnë zbulimin e të vërtetës.