Bujqësia në tkurrje për të pestin vit radhazi, shkak kryesor mungesa e mbështetjes

Mungesa e mbështetjes reale nga shteti mbetet shkaku kryesor pse bujqësia përjeton kriza të njëpasnjëshme dhe braktisje nga fermerët. Në fjalimet e drejtueseve të qeverisë,  ajo përmendet si prioritet kombëtar, por në terren subvencionet janë të pamjaftueshme dhe shumë fermerë të vegjël nuk arrijnë të marrin naftë ose lekë në llogaritë e tyre.

Për të pestin vit radhazi, sektori përjetoi rënie prodhimi, cka provon se procedurat burokratike, mungesa e informacionit dhe konkurrenca e pandershme po vrasin të gjitha premtimet për rregullimin e tregut.  

Edhe synimi për të kapur vlerën 1 mld euro për eksportet bujqësore në vitin 2030 nga 500 mln që janë sot, duket ambicioz, për sa kohë që vendet e Bashkimit Europian nuk pranojnë të marrin produktet tona, të cilat nuk plotësojnë standardet, sepse mungojnë kapacitetet e përpunimit.

Ministria e Bujqësisë ka një buxhet me vlerë 135 mln euro , për të menaxhuar sektorin. Me rritje progresive vjetore dhe me skemat e granteve e subvencioneve vlera që i dedikohet fermerëve e blegtoreve shkon në 250 mln euro këtë vit, duke pritur që këto politika mbështetëse të kenë rezultate konkrete, por që do të jetë e vështirë për të përmbysur realitetin që përcjell braktisja e tokave dhe zëri i fermerëve./euronews