Asnjë votë kundër, KLP vendos për rritjen e pagave të prokurorëve

Këshilli i Lartë i Prokurorisë vendosi rritjen e pagës referuese për prokurorët, duke ndjekur të njëjtin model të aplikuar për gjyqtarët

Me 11 vota pro dhe asnjë kundër, KLP përcaktoi pagën referuese në 222 mijë e 425 lekë.

Kësaj shume i shtohen edhe 14 mijë lekë për nivelin e kualifikimit, duke e çuar bazën e përllogaritjes së pagës në 236 mijë e 425 lekë. Vendimi vjen pas një situate të krijuar nga ndërhyrja e Gjykatës Kushtetuese mbi mënyrën e përcaktimit të pagave në sistemin e drejtësisë. Anëtari i KLP-së, Erind Mërkuri, tha se Këshilli ishte i detyruar të ndërhynte për shkak të boshllëkut ligjor të krijuar pas vendimit të Kushtetueses.

Sipas Mërkurit, Gjykata Kushtetuese ka shfuqizuar një normë ligjore dhe i ka lënë Kuvendit një afat për plotësimin e këtij boshllëku. Por, në kushtet kur ndryshimet ligjore nuk janë miratuar, KLP ka vendosur të referohet te vendimi i Gjykatës Kushtetuese.

Paga referuese e përcaktuar nga KLP lidhet me pagën e një pozicioni drejtues në Kryeministri, e cila shërben si bazë për përllogaritjen e pagave të prokurorëve.

Rritja e pagave të prokurorëve vjen pas ndryshimit të pagave të gjyqtarëve. Që prej 1 gushtit 2026, pagat e gjyqtarëve janë rritur me 65 mijë e 600 lekë, pas një vendimi të Këshillit të Lartë Gjyqësor.

Çështja ishte referuar në Gjykatën Kushtetuese nga Unioni i Gjyqtarëve, pas kundërshtimit të qeverisë ndaj rritjes së pagave. Gjykata Kushtetuese vlerësoi të papranueshme uljen e pagave dhe i la Kuvendit detyrën për të bërë ndryshimet e nevojshme ligjore.