Arrestohet autori që plagosi 17-vjeçarin në Cakran, babai i tij i shkon në spital të plagosurit

Policia e Fierit ka arrestuar adoleshentin që plagosi me thikë mëngjesin e djeshëm bashkëmoshatarin e tij në oborrrin e shkollës së mesme “Mustafa Hoxha” në Cakran.

Në pranga është vënë shtetasi B.D., 17 vjeç, i cili akuzohet për veprën penale “Vrasje me dashje”, e mbetur në tentativë.

Raportohet se 17-vjeçari i plagosur, shtetasi H. Xh. aktualisht ndodhet në spital për ndihmë mjekësore, jashtë rrezikut për jetën, teksa burime bëjnë me dije se ai ka marrë 4 goditje me thikë.

“Konflikti midis shtetasve të mitur ka nisur pasi shtetasi i dëmtur H. Xh., pretentonte se autori i dyshuar, shtetasi B. D., shpërndante në rrjetet sociale fotografi të tij.” – thuhet në njoftimin e Policisë.

Burime bëjnë me dije se dy 17-vjeçarët ishin konfliktuar edhe një ditë para ngjarjes, për shkak të një postimi në rrjetin social “Snapchat”, teksa të nesërmen e zhvendosën sherrin në oborrin e shkollës.