Plagosja në Fier/ Gjyshja e autorit: Nipi vuan nga probleme mendore, e trembte e ëma me kukuvajka

Një ngjarje e rëndë u regjistruar mëngjesin e djeshëm në gjimnazin “Mustafa Hoxha” në Cakran të Fierit, ku një 17-vjeçar mbeti i plagosur nga 4 goditje me thikë nga një bashkomoshatar i tij. Konflikti dyshohet se kishte nisur për shkak të një postimi në rrjetin social “Snapchat”.

Gjyshja e autorit, në një prononcim për mediat, tregon se nipi i saj vuan nga probleme të shëndetit mendor dhe për këtë kishte marrë edhe trajtim mjekësor, por që e kishte ndërprerë kohët e fundit. Ajo tregon se dy nipërit e mitur, djemtë e Fatmirit, i ka rritur ajo, pasi nëna e tyre i ka braktisur.

Gjithashtu, gjyshja 92-vjeçare tregon se një ditë para ngjarjes, nipit të saj ia kishin marrë me dhunë telefonin, madje i plagosuri e kishte goditur dhe me shkelmë.

“Ai ka qenë i sëmurë, trembej. E trembte e ëma, i thoshte të hëngërt kukuvajka! Edhe i çonte edhe dragonj, ai trembej në gjumë e kë të kapte sa mezi e përmendnim. Ishte 6 vjeç atëherë e deri sot, e vizituam, i dhamë kokrra. Nuk i piu, i tha një shok mos i pi. Trembej more vëlla, trembej! U pre ajo frika që piu kokrrat dhe u stabilizua. I tha një shok i shkollës mos t’i pijë, nuk i piu më.

Ata atë ditë e kishin thirrur, dhe dy, tre ata cakranjozët. Hajde të të shikojmë telefonin. Kishte vajtur, 6 veta ata, një ky. Ja kishin marrë telefonin, këtë e kam personale kishte thënë djali. Ai e kishte qëlluar me shkelma, ai djali që u vra. E kështu, çfarë të të thotë nëna! Nuk e dëgjonte të atin, pije të keqen babi. Ne donim firmën e nuses që ta vizitonim në Greqi, po ajo nuk e dha firmën. Ne atë kemi o të keqen nëna, mos na pyet se çfarë na ka gjetur!

Fatmirin e ka lënë gruaja, madje ka lënë edhe dy djemtë e mitur. Ata i kam rritur unë, sepse Fatmiri shkonte të gjente punë për të mbajtur familjen.” – u shpreh e moshuara.