Akulli burim aksidentesh në aksin Burrel-Skuraj, disa mjete dalin nga rruga

Temperaturat e ulta gjatë natës kanë krijuar probleme në rrugën nacionale Burrel – Skuraj. Prania e ujit gjatë ditës është kthyer në akull natën pasi temperatura zbriti deri në – 5 gradë celsius.

Problem për drejtuesit e mjeteve ishte segmenti në afërsi të ish bazës së asfaltit, ku e gjithë rruga ishte mbuluar nga akulli.

Drejtuesit e mjeteve shprehen se janë përballur në befasi me praninë e akullit dhe se në orët e para të mëngjesit ka patur mjete që kanë dalë nga rruga. Ata kërkojnë që firma mirëmbajtëse të bëjë kujdes dhe të kriposë vendet e rrezikshme ku ka prani akulli.

Aksi Burrel – Skuraj vijon të jetë problematik për shkak të amortizimit të asfaltit, por edhe prani të ngricave kryesisht në afërsi të urës së Ulzës dhe Shkopet.