30 ditë agjërim për besimtarët myslimanë, nis muaji i shenjtë i Ramazanit. Mesazhi i kreut të KMSH

Për 30 ditë me radhë, besimtarët myslimanë do të agjërojnë muajin e shenjtë të Ramazanit. Një muaj ku besimtarët kufizohen nga e ngrëna, e pira dhe marrëdhëniet bashkëshortore, nga agimi i diellit deri në perëndimin e tij.

Veç këtyre ndalimeve, besimtarët kanë edhe një detyrë shumë të rëndësishme, të solidarizohen me njerëzit në nevojë. Agjërimi vjen edhe me një sfidë tjetër, përmirësimi i sjelljes dhe largimit nga veset.

“Agjërimi nuk është vetëm tek e ngrëna dhe tek e pira, por gjuha jote të agjërojë, pra të flasë mire”, tha Profeti A.S. “Kush nuk e lë mashtrimin dhe gënjeshtrën, nuk ka nevojë Zoti që ata të agjërojnë”, shtoi ai.

Një pjesë e besimtarëve i shfrytëzojnë këto ditë për të lexuar Kuranin, teksa shprehen se këtë muaj e presin me shumë gëzim.

Muaji i agjërimit mbyllet mbrëmjen e 9 prillit dhe më datë 10 prill bëhet falja e madhe e Fiter Bajramit, në orët e para të mëngjesit. 

Ndërkohë kreu i Komunitetit Mysliman të Shqipërisë, Bujar Spahiu, e cilësoi këtë një mundësi për të rritur forcën shpirtërore dhe solidaritetin.