Tri gjoba brenda 10 ditëve/ Shoferi sfidon policinë, xhiron gomat dhe përplas efektivët

Një shofer 33-vjeçar është kthyer në shqetësim për policinë. Pavarësisht se kishte marrë tri gjoba brenda dhjetë ditëve për manovra të rrezikshme në rrugë dhe gara shpejtësie në qendrat e banuara, ai nuk “ka zënë mend”.

Në orët e para të mëngjesit, ai xhironte gomat e “Benz-it” në rrugë, duke shqetësuar qytetarët. Këta të fundit kanë lajmëruar policinë, të cilët shkuan në adresën e dhënë me qëllimin për të ndaluar dhe ndëshkuar shoferin. Por ai nuk ndaloi kur iu kërkua diçka e tillë dhe shtoi shpejtësinë. Për këtë arsye, Patrulla e Përgjithshme kërkoi ndihmën e forcave “Shqiponja”.

Pavarësisht shtimit të forcave, shoferi sërish nuk u tremb dhe në Bulevardin “Gjergj Fishta”, sërish nuk u bind për të ndaluar. Duke u larguar me shpejtësi, ai aksidentoi mjetin e policisë dhe efektivin e “Shqiponjave” dhe më pas u largua.

Gjatë rrugës ai përplasi edhe një makinë tjetër policie dhe në këtë moment u bë i mundur arrestimi i tij. 33-vjeçarit iu pezullua leja e drejtimit, iu hoqën të gjitha pikët e lejes së drejtimit, u ndëshkua me vlerë maksimale 100.000 lekë të rinj dhe ndalim administrativ të mjetit për 1 muaj.