21-vjeçari kapet me 297 doza her'oine dhe ko'kaine, arrestohet në Durrës

Një 21-vjeçar është arrestuar në flagrancë në Durrës, pasi u kap me 297 doza të dyshuara heroine dhe kokaine, të cilat dyshohet se i posedonte për t’i shitur në zona të ndryshme të qytetit.

Operacioni është zhvilluar nga specialistët e Sektorit për Hetimin e Narkotikëve, në bashkëpunim me shërbimet e Forcës së Posaçme “Shqiponja”, në kuadër të aksioneve kundër shpërndarjes së lëndëve narkotike.

Sipas policisë, gjatë operacionit të koduar “Pikat”, në lagjen nr. 16 të Durrësit u arrestua shtetasi J. K., 21 vjeç, banues në Shkozet.

Gjatë kontrollit, efektivët i gjetën të riut sasi të lëndëve të dyshuara narkotike, të ndara në doza të gatshme për shpërndarje. Në total u sekuestruan 129 doza të dyshuara heroine dhe 168 doza të dyshuara kokaine.

Policia dyshon se 21-vjeçari i kishte ndarë lëndët narkotike në doza me qëllim shitjen e tyre në zona të ndryshme të qytetit.

Materialet procedurale në ngarkim të tij i janë referuar Prokurorisë për veprime të mëtejshme.