Aktori shqiptar pretendon: Ata që thyenin dyqanet te "Rruga e Durrësit" nuk flisnin shqip me njëri-tjetrin

Aktori i njohur Laert Vasili ka deklaruar se protestuesit që kanë kryer akte dhune dhe vandalizmi në "Rrugën e Durrësit" nuk flisnin shqip me njëri-tjetrit.

I ftuar në emisionin “Off the Record”, Vasili iu referua pohimeve të një familjari të tij me banim në Rrugën e Durrësit, që ka qenë dëshmitar në vendngjarje.

Vasili bëri një dallim mes 140 ditëve protestë të "Flamingove" dhe 10 ditëve të protestave të fundit nga studentët dhe gjimnazistët, duke u shprehur se nuk janë të njëjtët njerëz. 

“Këto 140 ditë protestë nuk përkojnë me 10 ditët e tjera, nuk janë të njëjtët njerëz.

E thashë dhe do ta rithem, një familjar i imi që e ka shtëpinë në Rrugën e Durrësit në katin e parë, kur po thyhej dyqani kishte dalë në shqetësim dhe dëgjonte që ata që po thyenin nuk flisnin shqip.

E dini si përçahet një komb?!

 Nuk flisnin shqip me njëri-tjetrin. Ky është pohim, s’është aludim, as alibi. Me statistika janë policë më shumë të dëmtuar që janë edhe ata bij nënash”, tha ai.