Universitetet publike në protestë, pedagogë e studentë bojkotojnë mësimin nga ora 10:00

Prej orës 10:00 të ditës së sotme, pritet të nisë protesta e nëntë e studentëve në Tiranë. 

Së bashku me pedagogët, të rinjtë dhe qytetarë të tjerë do të marshojnë nga universitetet, për t'u mbledhur para godinës së Kryeministrisë. Aty, edhe ditën e sotme i presin karriget e vendosura nga kryeministri Edi Rama, që është shprehur i hapur për dialog. 

Kujtojmë se ditën e djeshme ndodhi e njëjta gjë, por karriget u hodhën në tokë dhe studentë e pedagogë njëzëri, u shprehen se nuk do të ketë dialog. 

Pasditen e djeshme, Sindikata e Punonjësve të Universiteteve të Shqipërisë (SPUSH) ka vendosur që të bojkotojë mësimin në të gjitha universitetet publike, duke nisur nga dita e sotme, deri në një njoftim të dytë. 

Sindikalistët kërkojnë ndalimin e dhunës ndaj protestuesve, hetim të pavarur për ngjarjet që prej 13 tetorit dhe plotësimin e kërkesave të studentëve. Pedagogët do të mblidhen çdo ditë në orën 10:00 para Korpusit Qendror të Universitetit Politeknik të Tiranës.

Protesta e 20 tetorit ishte e para ku morën pjesë dhe pedagogët dhe për disa orë, u zhvillua si një tubim masiv e paqësor. Megjithatë, në mbrëmje, nisën përplasjet e dhunshme mes polciisë dhe protestuesve, ku pati dhe shoqërime. Gjithashtu, një i riu u dërgua në gjendje të rëndë në spital, pasi u gjuajt me plumba gome në zonën e barkut.