Trazirat në Francë tronditin tregjet evropiane, bursat nisin javën në rënie

Tregjet evropiane të aksioneve e nisën javën në rënie, mes shqetësimeve të investitorëve për pasojat e protestave të dhunshme që tronditën Francën gjatë fundjavës. Paqëndrueshmëria politike dhe sociale në ekonominë e dytë më të madhe të Eurozonës po shton pasigurinë për perspektivën e rritjes ekonomike.

Bursa e Parisit regjistroi humbjet më të mëdha ndër tregjet kryesore evropiane. Indeksi CAC 40 ra me 1.18%, duke zbritur në 7,862.81 pikë, ndërsa investitorët vlerësuan ndikimin e trazirave, të shoqëruara me arrestime, dëmtime të pronave dhe plaçkitje dyqanesh.

 Rënia u përhap edhe në bursat e tjera të kontinentit. Indeksi pan-evropian Stoxx 600 humbi 0.57%, duke zbritur në 641.05 pikë, pas rritjes me më shumë se 2% gjatë javës së kaluar.

Rënie në bursat kryesore evropiane

Tregjet kryesore të Evropës e nisën javën me humbje, ndërsa rëniet më të ndjeshme u regjistruan në Francë, Itali dhe Spanjë.Indeksi gjerman DAX ra me 0.69%, në 25,444.76 pikë, ndërsa FTSE 100 në Londër humbi 0.54%, duke zbritur në 10,823.30 pikë. Në Milano, indeksi FTSE MIB u ul me 1.01%, në 49,355.71 pikë, ndërsa IBEX 35 në Madrid ra me 1.19%, në 19,096.90 pikë.

Presioni më i madh u vu re në sektorin bankar. Indeksi përkatës evropian shënoi një rënie prej 1.4%, pasi shtimi i pasigurisë nxiti kujdesin e investitorëve ndaj aksioneve financiare. Zhvillimet në Francë po ndiqen nga afër nga tregjet, ndërsa investitorët vlerësojnë se sa mund të ndikojnë tensionet politike dhe sociale në besimin e bizneseve dhe në ecurinë ekonomike të vendit.