SHBA bllokon aksesin e huaj te modelet më të fuqishme të inteligjencës artificiale të Anthropic

Administrata e presidentit Donald Trump ka vendosur të bllokojë qeveritë, kompanitë dhe individët e huaj nga aksesi në modelet më të avancuara të inteligjencës artificiale të kompanisë Anthropic, duke i trajtuar këto sisteme si asete të sigurisë kombëtare.

Sekretari i Tregtisë, Howard Lutnick, i dërgoi të premten një letër drejtuesit të Anthropic, Dario Amodei, duke njoftuar se modelet Mythos 5 dhe Fable 5 do t'i nënshtrohen kontrollit të eksportit për çdo vend jashtë territorit amerikan, si dhe për të gjithë personat e huaj brenda vendit.

Sipas një zyrtari të administratës, Departamenti i Tregtisë mori këtë vendim pasi një kompani tjetër pretendoi se kishte arritur të kapërcejë kufizimet e sigurisë të modelit Mythos  i njohur si "jailbreak"  duke ngritur alarme serioze lidhur me rreziqet e mundshme ndaj sigurisë kombëtare.

Zyrtari shtoi se administrata kishte kërkuar nga Anthropic të ndalonte lëshimin e modeleve të fundit, por pa sukses  gjë që e shtyu Departamentin e Tregtisë të ndërmerrte masa zyrtare.

Modeli duhet të qëndrojë i bllokuar derisa aparati i sigurisë kombëtare i qeverisë amerikane të forcohet, sipas po këtij zyrtari, duke shtuar se kjo mund të ndodhë brenda disa javësh.

Sipas letrës zyrtare, do të kërkohet licencë e posaçme për eksportimin, rieksportimin ose transferimin e brendshëm të modeleve të Anthropic. Kompania do të duhet gjithashtu të paraqesë aplikime shtesë për licenca të individualizuara. Mosrespektimi i këtyre rregullave mund të çojë në sanksione financiare dhe civile.

Ky vendim shënon një eskalim të mëtejshëm të konfliktit midis Anthropic dhe qeverisë federale. Kompania gjendet tashmë në një listë të zezë të Pentagonit  që e konsideron atë të rrezikshme për përdorim qeveritar  dhe tani edhe nën regjimin e kontrollit të eksportit të Departamentit të Tregtisë.

Administrata Trump ka nxjerrë gjithashtu një urdhër ekzekutiv këtë muaj për testimin paraprak të modeleve më të avancuara të AI-t para vendosjes së tyre. Anthropic ka një partneritet me Qendrën për Standardet dhe Inovacionin e AI-t pranë Departamentit të Tregtisë për teste paraprake.

Megjithatë, ky urdhër ekzekutiv ka karakter vullnetar dhe shmang regjimin e licencave — diçka që këshilltari i Shtëpisë së Bardhë për AI-n, David Sacks, e siguroi për të evituar atë që ai e quan "kapje rregullatore" nga laboratorët e mëdhenj.

Një zyrtar i administratës deklaroi se presidenti Trump "nuk dëshiron të dëmtojë industrinë dhe dëshiron të vazhdojë inovacioni."