Lajm i trishtë/ Po kthehej në shtëpi me biçikletë, aksidentohet për vdekje futbollisti i ri shqiptar (FOTO)

Një aksident i rëndë rrugor në provincën e Vicenzës në Itali i ka marrë jetën Manuel Korreshit, një 15-vjeçari me origjinë shqiptare. Adoleshenti po kthehej në shtëpi me biçikletë kur u godit nga një automjet në zonën e Riviera Berica, pranë Ponte di Barbarano.

Përplasja ndodhi në rrugën provinciale 247, ndërsa 15-vjeçari po udhëtonte në drejtim të veriut. Sipas rindërtimit paraprak të ngjarjes, Manueli po i afrohej një rrethrrotullimi, disa qindra metra përpara hyrjes në Ponte di Barbarano, kur u godit nga pas nga një makinë që lëvizte në të njëjtin drejtim.

Forca e përplasjes e hodhi të miturin në asfalt, ndërsa më pas ai përfundoi në një kanal në anë të rrugës, disa metra larg vendit të goditjes.

Drejtuesi i automjetit ndaloi pas aksidentit dhe njoftoi menjëherë shërbimet e emergjencës. Në vendngjarje mbërriti një ambulancë e Suem me personel mjekësor.

Manueli ishte pa ndjenja kur u gjet nga ekipet e shpëtimit. Pas ndërhyrjes së parë, ai u stabilizua dhe u intubua përpara se të transportohej me urgjencë drejt spitalit San Bortolo në Vicenza.

Gjendja e tij ishte tepër e rëndë dhe 15-vjeçari u shtrua në njësinë e kujdesit intensiv pediatrik. Pavarësisht përpjekjeve të mjekëve, plagët e marra rezultuan fatale dhe adoleshenti ndërroi jetë pak para orës 20:00.

Sipas informacioneve të raportuara për ngjarjen, Manueli kishte qenë më herët me të atin në Barbarano dhe në momentin e aksidentit po kthehej në banesën ku jetonte me nënën në Castegnero Nanto.

Shoferi: “Nuk e pashë”

Drejtuesi i automjetit u mor në pyetje nga Karabinierët dhe deklaroi se nuk e kishte dalluar biçikletën për shkak të errësirës.

“Ishte shumë errësirë. As nuk e vura re derisa u shfaq papritur para meje”, ka deklaruar ai, sipas raportimeve për ngjarjen.

Hetuesit po punojnë tashmë për të rindërtuar me saktësi dinamikën e përplasjes. Një nga elementët që pritet të verifikohet është nëse biçikleta me të cilën udhëtonte 15-vjeçari kishte dritën të ndezur në momentin e aksidentit.

Për ngjarjen është vënë në dijeni edhe Prokuroria. Autoritetet po vlerësojnë sekuestrimin e mjeteve të përfshira dhe hapjen e një hetimi për vrasje rrugore, ndërsa përgjegjësitë do të përcaktohen pas përfundimit të verifikimeve.

Kush ishte Manuel Korreshi

Manuel Korreshi ishte nxënës në Institutin Lampertico në Vicenza dhe kishte një pasion të madh për futbollin. Ai ishte pjesë e AC Este dhe më herët kishte luajtur në ekipet e moshave të Longare Castegnero.

15-vjeçari lë pas prindërit e tij, me origjinë shqiptare, si dhe vëllain e madh, Enea. Dy vëllezërit kishin ndarë edhe pasionin për futbollin, duke luajtur së bashku në ekipet e të rinjve të Longare Castegnero. Enea është aktualisht pjesë e Este U16.

Lajmi për vdekjen e Manuelit ka shkaktuar tronditje mes miqve, shokëve të skuadrës dhe bashkëmoshatarëve të tij në shkollë.

“Fluturo lart, sulmues”, ishte një nga mesazhet me të cilat miqtë e kujtuan 15-vjeçarin pas lajmit tragjik.