Superjahti i pronarit të Manchester City ankorohet në Durrës, mjeti luksoz do të furnizohet me 700 mijë litra naftë

Një nga superjahtet më të njohura në botë ka mbërritur në Portin e Durrësit. Bëhet fjalë për A+, në pronësi të Sheikh Mansour bin Zayed Al Nahyan, anëtar i familjes mbretërore të Abu Dhabit dhe pronar i klubit anglez Manchester City.

Superjahti, i cili deri në vitin 2019 njihej me emrin Topaz, është ndërtuar në vitin 2012 nga kompania Lürssen. Ai është 147 metra i gjatë dhe vlera e tij, së bashku me anijen mbështetëse M2 që e shoqëron, vlerësohet në rreth 450 milionë dollarë.

Së bashku me M2, e ndërtuar në Rumani dhe që lundron nën flamurin e Ishujve Kajman, dy anijet pritet të furnizohen me rreth 700 mijë litra naftë.

Vetëm nga taksa direkte e luksit prej 0.40 euro për litër, buxheti i shtetit pritet të arkëtojë rreth 280 mijë euro.  Vetëm gjatë vitit 2025, nga taksa e luksit për furnizimet me naftë në portet shqiptare u arkëtuan mbi 12 milionë euro.