60 ditë nga Polonia, alarm i kuq për kuqezinjtë: Sylvinho përballë një skuadre pa ritëm

Numërimi mbrapsht për gjysmëfinalen e Play-off-it të Botërorit ka nisur dhe Shqipëria ka vetëm 60 ditë për t’u përgatitur për sfidën vendimtare ndaj Polonisë në Varshavë. Por, ndryshe nga entuziazmi i viteve të shkuara, situata aktuale në kampin kuqezi është shqetësuese.

Forma dhe minutazhi i legjionarëve ngrejnë alarmin për trajnerin Sylvinho. Reparti i sulmit është pika më e dobët: Armando Broja po kalon një sezon të vështirë te Burnley, Rey Manaj shënon pak në Emiratet e Bashkuara Arabe, ndërsa niveli i kampionatit mbetet një pikëpyetje. Shpresa kryesore mbetet Ernest Muçi, i cili po shkëlqen me Trabzonsporin.

Në mesfushë, dilema kryesore është Nedim Bajrami, i rikthyer së fundmi nga dëmtimi, ndërsa Kristjan Asllani nuk po gjen vazhdimësi. I vetmi element i sigurt është Ylber Ramadani, titullar i përhershëm te Lecce.

Në mbrojtje dhe portë, Thomas Strakosha po kalon një periudhë pozitive, por krahët mbeten problematikë: Elseid Hysaj ka pak minuta te Lazio, ndërsa Mario Mitaj aktivizohet rregullisht, por jashtë ritmit europian.

Me shumicën e formacionit larg formës optimale, Sylvinho përballet me një “dhimbje koke” serioze, në prag të një prej ndeshjeve më të rëndësishme në historinë e futbollit shqiptar.