Zbuloni se ku ndodhet pema më e gjatë e Krishtlindjes….

Gjermania po tërheq sërish vëmendjen e turistëve këtë dimër, falë një prej atraksioneve më spektakolare festive në Europë: pemës më të madhe të Krishtlindjeve në botë, e cila ngrihet çdo vit në sheshin Hansaplatz të Dortmundit. Dortmunder Weihnachtsbaum është shndërruar në një simbol të qytetit dhe një pikë referimi për sezonin e festave.

Kjo strukturë gjigante arrin deri në 45 metra lartësi dhe ndërtohet me rreth 1,200 bredha norvegjezë të vendosur një nga një për të krijuar pamjen e një peme të vetme monumentale.

Në majë të saj qëndron një engjëll 4-metërsh, i cili ndriçon mbi shesh dhe është ndër figurat më të fotografuara nga vizitorët gjatë gjithë muajit dhjetor.

Pema peshon rreth 40 tonë dhe zbukurohet me mbi 140,000 drita LED, duke e kthyer Hansaplatz në një skenë të vërtetë festivale. Ndezja e saj organizohet çdo vit si një event publik, ku qindra njerëz mblidhen për të shënuar fillimin e zyrtar të atmosferës së festave.

Dortmunder Weihnachtsbaum është më shumë se një instalacion dekorativ; ai përfaqëson një traditë të gjatë dhe të dashur, që vazhdon të sjellë gëzim për familjet dhe turistët nga e gjithë bota.