Nga 1 maji rregulla të reja të BE-së për kozmetikën: Kufizime për substanca të rrezikshme, ndalime për disa produkte

Nga 1 maji 2026 hyjnë në fuqi rregulla të reja të Bashkimit Europian për produktet kozmetike, që synojnë rritjen e sigurisë për konsumatorët dhe kontroll më të rreptë mbi përbërësit potencialisht të dëmshëm.

Rregullorja e re, e miratuar më 12 janar 2026, vendos kufizime më të forta për substancat e klasifikuara si CMR (kancerogjene, mutagjene ose toksike për riprodhimin), duke prekur drejtpërdrejt produkte të përdorura gjerësisht si manikyrët, parfumet, make-up-i dhe artikujt e higjienës orale.

Një nga ndryshimet kryesore lidhet me përdorimin e argjendit (CI 77820), i cili përdoret për efekte shkëlqyese dhe metalike.

Sipas rregullave të reja, ky përbërës do të lejohet vetëm deri në 0.2% dhe vetëm në kategori të caktuara si buzëkuq, gloss dhe rimel për sytë.

Ndërkohë, do të ndalohet përdorimi i tij në manikyrë, xhel për thonj dhe produkte për rikonstruksionin e tyre, si dhe në sprej dhe produkte aerosol. Kjo do të thotë se shumë produkte aktuale me efekt metalik ose glitter argjendi nuk do të jenë më në përputhje me standardet e reja dhe nuk do të mund të përdoren as në qendrat estetike.

Industria e bukurisë në Europë pritet të përballet me një periudhë përshtatjeje, ndërsa prodhuesit dhe profesionistët e fushës do të duhet të reformulojnë produktet dhe të përditësojnë praktikat e tyre për të përmbushur kërkesat e reja ligjore.

Këto masa janë pjesë e një përpjekjeje më të gjerë të BE-së për të garantuar një nivel më të lartë mbrojtjeje për shëndetin publik dhe për të reduktuar ekspozimin ndaj substancave potencialisht të rrezikshme në përdorimin e përditshëm.