Eklipsi diellor më i gjatë i 100 viteve të fundit ka një datë dhe nuk duhet ta humbisni

Brenda më pak se dy vitesh, qielli do të na dhurojë një spektakël që nuk ndodh shpesh në histori: eklipsin diellor total më të gjatë të 100 viteve të fundit, i cili do të ndodhë më 2 gusht 2027.

Sipas kalendarit zyrtar të NASA-s, faza e plotë e eklipsit momenti kur dielli mbulohet krejtësisht nga hija e Hënës do të zgjasë 6 minuta e 23 sekonda, një kohëzgjatje jashtëzakonisht e rrallë për një eklips total.

Gjatë atyre minutave, zona të tëra të Europës, Afrikës së Veriut dhe Lindjes së Mesme do të futen nën hijen e Hënës dhe dita do të kthehet për pak çaste në një natë blu misterioze.

Ku do të shihet më mirë eklipsi?
Sipas hartës së NASA-s, rruga e eklipsit do të jetë kjo:

-do të nisë në Marok dhe në jug të Spanjës
-më pas do të kalojë mbi Algjeri, Tunizi, Libi, Egjipt dhe Arabinë Saudite
-dhe do të përfundojë drejt Jemenit dhe brigjeve të Somalisë
Pika ku eklipsi do të zgjasë më shumë do të jetë Egjipti, sidomos rreth Luxor-it dhe Asuanit, dy qytete të famshme për tempujt dhe sitet e tyre të lashta. Për astronomët dhe udhëtarët, këto priten të jenë destinacionet “golden spot” të vitit 2027.

A është i rrezikshëm ky eklips?
Nga pikëpamja shkencore, eklipsi nuk ka asnjë efekt fizik të veçantë mbi planetin apo shëndetin tonë është një fenomen natyror, i parashikueshëm, që ndodh kur Dielli, Hëna dhe Toka rreshtohen në një vijë të drejtpërdrejtë.

Megjithatë, vlen gjithmonë e njëjta paralajmërim:
mos shikoni kurrë drejt e në Diell pa syze të posaçme mbrojtëse, as gjatë eklipsit. Sytë dëmtohen pa u ndjerë menjëherë, por pasojat mund të jenë serioze.

Për kuriozët: eklipset diellore nuk janë “privilegj” vetëm i Tokës. Fenomene të ngjashme janë vëzhguar edhe në Mars dhe madje në Hënë, falë sondave hapësinore.

Eklipset e tjera “maratonë” të këtij shekulli
Eklipsi i 2 gushtit 2027 është më i gjati i 100 viteve të fundit, por jo i vetmi me kohëzgjatje mbresëlënëse. NASA ka llogaritur edhe disa eklipse të tjerë totalë, me kohëzgjatje mbi 5 minuta, por për to do të duhet të presim dekada:

12 gusht 2045 – 6 minuta e 6 sekonda
30 prill 2060 – 5 minuta e 12 sekonda
24 gusht 2063 – 5 minuta e 49 sekonda
11 maj 2078 – 5 minuta e 40 sekonda
3 shtator 2081 – 5 minuta e 33 sekonda
22 maj 2096 – 6 minuta e 6 sekonda
Deri atëherë, të gjithë sytë (me syze të sigurta, sigurisht) do të jenë te 2 gushti 2027 data kur qielli do të na rikujtojë sa i vogël është njeriu përballë kozmosit, por sa me fat jemi që mund ta vëzhgojmë.