Vështirësitë ekonomike e detyrojnë të hapë llogari në OnlyFans/ Ylli i "Harry Potter": Ishte e sikletshme, po kërkoj punë

Jessie Cave, aktorja britanike e njohur për rolin e Lavender Brown në filmat e “Harry Potter”, ka folur për vendimin e saj për të hapur një llogari në platformën OnlyFans, duke thënë se fillimisht u ndje në siklet dhe se dëshiron të gjejë sërish një punë.

Duke folur në emisionin britanik “This Morning”, aktorja 39-vjeçare tha se të ardhurat nga aktrimi nuk ishin të mjaftueshme për të përballuar shpenzimet e familjes, veçanërisht kujdesin për katër fëmijët e saj.

“Njerëzit thjesht supozojnë se jam e pasur, se kam shumë para, por jo, nuk kam. Kështu që ishte e turpshme, sepse në një nivel do të doja shumë të gjeja një punë”, tha Cave.

Ajo e përshkroi aktrimin si një profesion me pak siguri financiare, duke shpjeguar se për shumë vite kishte arritur të punonte në role të ndryshme, por rreth dy vite më parë u përball me vështirësi të mëdha ekonomike.

Cave, e cila është shfaqur edhe në serialin “Industry”, tha se vendimi për të hapur llogarinë në OnlyFans u ndikua edhe nga figura të tjera publike që përdorin platformën, përfshirë Lily Allen dhe Kate Nash.

Sipas saj, përvoja nuk ka qenë vetëm financiare. Ajo tha se përmes platformës ka pasur mundësi të lidhet me njerëz nga vende të ndryshme dhe se krijimi i përmbajtjes e ka ndihmuar të ndihet më e sigurt me veten.

Përmbajtja e Cave në platformë nuk është seksualisht eksplicite dhe përfshin kryesisht video ku ajo shfaqet duke krehur dhe gërshetuar flokët, si dhe duke interpretuar personazhe të ndryshme, mes tyre edhe Lavender Brown.

Aktorja ka treguar se në mars të vitit 2025 nisi të krijonte përmbajtje në platformën me pagesë. Në një intervistë për “The Times”, ajo tha se nuk mund të punonte në një supermarket për shkak të kostove të kujdesit për fëmijët dhe vëmendjes që do të merrte si aktore e “Harry Potter”.

Cave tha gjithashtu se në një ditë të vetme kishte fituar më shumë se 15 mijë paund nga OnlyFans.

Ajo pretendon se brenda një viti ka fituar më shumë nga platforma sesa gjatë gjithë karrierës së saj si aktore.

Megjithatë, Cave pranoi se numri i abonentëve ra pasi përdoruesit kuptuan se ajo nuk do të publikonte përmbajtje seksuale eksplicite, por tha se ka ende një numër të konsiderueshëm ndjekësish besnikë.