Ronaldo largohet me avionin privat nga Arabia Saudite për në Spanjë, pas sulmeve nga Irani

Cristiano Ronaldo u largua nga Riyadh drejt Madrid, pasi Asian Football Confederation suspendoi ndeshjet e Rajonit Perëndimor të AFC për shkak të luftës në Iran dhe sulmeve me dronë e raketa në Gjirin Persik.

Sipas të dhënave të Flightradar24, avioni privat Bombardier Global Express i yllit portugez u nis nga Riyadhi rreth orës 21:00 me kohën lokale të hënën dhe mbërriti në Spanjë gjatë natës së së martës, duke kaluar mbi Egjipt dhe Mesdhe.

Sulmuesi 39-vjeçar i Al-Nassr u largua nga Arabia Saudite pasi ndeshja e tij e çerekfinales së AFC Champions League kundër Al-Wasl u shty. Fillimisht, ajo ishte planifikuar për të mërkurën në Dubai.

Shtetet e Bashkuara njoftuan se ambasada e tyre në Riyadh u godit nga dy dronë në mëngjesin e së martës, duke shkaktuar vetëm dëmtime materiale të vogla dhe zjarr të kufizuar, pa persona të lënduar, sipas Ministrisë së Mbrojtjes Saudite. Ronaldo jeton në Riyadh së bashku me partneren e tij Georgina Rodriguez dhe pesë fëmijët e tyre.

AFC njoftoi të dielën se do të riplanifikojë të gjitha ndeshjet e raundit të 16-të të Champions League për Rajonin Perëndimor, të parashikuara fillimisht më 2-3 mars, për shkak të shqetësimeve të sigurisë. Ndeshjet e klubeve nga Rajoni Lindor do të zhvillohen sipas programit origjinal.

Kjo ndodh ndërsa Teherani ka nisur valë sulmesh me raketa dhe dronë në rajon si hakmarrje për sulmet e përbashkëta amerikano-izraelite që vranë Ayatollah Ali Khamenei të Iranit të shtunën.

Sezonin aktual, Ronaldo ka shënuar 22 gola në 26 ndeshje për Al-Nassr, dhe kontrata e tij me klubin saudit zgjat deri në vitin 2027.