Ndahet nga jeta Gloria Steinem, nga 'lepurushe' e Playboy në gazetare që transformoi lëvizjen e gruas

Gloria Steinem, gazetarja dhe aktivistja ikonike amerikane që u bë një nga zërat më të fuqishëm të lëvizjes feministe, ka ndërruar jetë në moshën 92-vjeçare.

Sipas fondacionit të saj, Steinem u nda nga jeta në paqe, në shtëpinë e saj në Nju Jork, e rrethuar nga njerëzit e saj të dashur. Me vdekjen e saj mbyllet një kapitull i rëndësishëm i historisë së luftës për barazi gjinore në Shtetet e Bashkuara.

Steinem u bë e njohur fillimisht si gazetare, në një periudhë kur redaksitë amerikane dominoheshin kryesisht nga burrat. Me kalimin e viteve, ajo u shndërrua në një prej figurave qendrore të valës së dytë të feminizmit amerikan.

Ajo shkroi, foli, organizoi fushata dhe mori pjesë drejtpërdrejt në jetën politike, duke ndihmuar që çështje që dikur konsideroheshin vetëm probleme private të grave të shndërroheshin në tema të rëndësishme të debatit publik.

Në vitin 1971, Steinem ishte ndër gratë që themeluan Aleancën e Veprimit të Grave, me synim luftën kundër diskriminimit gjinor. Në të njëjtën periudhë, ajo mori pjesë në krijimin e revistës “Ms.”, e cila u shndërrua në një prej botimeve më të rëndësishme të lëvizjes feministe amerikane.