Ylli Manjani rrëfen bisedën e fundit me Artan Lamen: Fiks para një jave, më tha do ngjis tubin e gjakut!

Kjo e enjte trishtoi jo pak të gjithë ata miq të shumtë të Artan Lames, të cilin zemra e tradhtoi në shtratin e një spitali në Gjermani.

Humbja e parakohshme e Tanit, ashtu si dhe miqtë dhe shokët e thërrisnin, ka bërë që shumë figura publike të reagojnë dhe përmes rreshtave të shkruar në postimet e tyre të shprehin dhimbjen për humbjen e një njeriu i cili përgjatë gjithë jetës së tij ishte kurdoherë aty për ta.

Së fundmi ka qenë ish-ministri i Drejtësisë, Ylli Manjani i cili i shokuar nga lajmi që lexoi mëngjesin e kësaj të enjte, ka kujtuar dhe telefonatën e fundit që kishte zhvilluar me Lamen.

Kjo telefonatë u bë mes tyre një javë më parë, një telefonatë mes miqsh, ku përpos problemeve, e situatës politike në vendin tonë, ata kishin biseduar edhe për ndërhyrjen kirurgjikale që Lame do të kryente.

Më tej Manjani zbulon se e kishin lënë sërish të flisnin pas ndërhyrjes, por fatkeqësisht kjo telefonatë mbeti thjesht një fjalë e thënë mes dy shokësh.

“E lamë të flisnim pas ndërhyrjes...Sot lexova lajmin e kobshëm! Se di!Trishtim!”, shkruan ish-ministri.

Postimi i plotë i Manjanit:

Fola në telefon të enjten me Lamen. Fiks para një jave . "Do operohem të ngjis tubin e gjakut", më tha. "Zemrën e kam top, por tubat jo"- vijoi...

Paske nevojë për hidraulik, jo për doktor- i thashë.

Qeshëm...

Folëm për rezultatin e zgjedhjeve. Edhe për pak politikë...

Ai më tregoi një histori nga koha e shkuar. Ja ktheva me një barcoletë nga të zakonshmet. Qeshëm prap.

E lamë të flisnim pas ndërhyrjes...

Sot lexova lajmin e kobshëm!

Se di!

Trishtim!

*****

Mbase është i pavërtetë lajmi...

Lutem!

Zakonisht e bën një biçim udhëtimi nganjëherë andej matanë e kthehet prap.

Se di!

Po sdua ta besoj atë lajm.

Shuhet Artan Lame!