Vlora Hyseni në arrest, Berisha denoncoi më herët lidhjet e kreut të SHISH me Agasin

SPAK lëshoi sot masën e sigurisë arrest në shtëpi për kryetaren e SHISH, Vlora Hyseni, e cila po hetohet për dosjen e AKSHI-t. Ajo është denoncuar nga kreu i Partisë Demokratike, Sali Berisha, më 27 gusht, një ditë pas arrestimit të Ergys Agasit.

“Ergys Agasi ishte dhe është personi, që sipas pohimeve verbale, ndryshonte, emëronte, çemëronte ministrat e Brendshëm dhe kishte një kontroll fjollë mbi SHIK-un, tashmë të denoncuar nga unë prej vitesh në mënyrë të përsëritur.

Miqësia e kryetares së SHIK-ut, drejtoreshës së SHIK-ut, me Agasin është denoncuar në mënyrë të përsëritur nga kjo platformë.

Kemi paralajmëruar se shtrirja e kontrollit dhe influencës së këtij mafiozi mbi Shërbimin Informativ Kombëtar nëpërmjet miqësisë që kishte me Hysenin, e njohur tashmë si agjente e përbashkët e Ramës dhe Vuçiçit, lë dyshimet më të mëdha për infektimin e këtij institucioni.

Ergys Agasi ka pasur de facto, jo de jure, si arkitekt të interiorit, Edi Ramën për vilën e tij të ndërtuar pikërisht në zonën e ndërtesave qeveritare në Durrës. I kemi denoncuar me kohë vizitat e tij, angazhimin e tij gjer në detaje në arredimin e vilës së supermafiozit Ergys Agasi”, deklaroi kreu demokrat më 27 gusht.