“SPAK të nisë urgjentisht hetimet për Ramën”/ Meta reagon për çështjen “McGonigal”

Kryetari i Partisë së Lirisë, Ilir Meta i ka bërë thirrje Prokurorisë së Posaçme kundër Korrupsionit dhe Krimit të Organizuar (SPAK) që të nisë urgjentisht hetimet për kryeministrin Rama për lidhjet e tij me ish-zyrtarin e FBI-së.

Në një postim në Facebook, Meta akuzon Ramën se është i përfshirë drejtpërdrejtë në aferën më të rëndë shtetërore, atë të korruptimit të një ish-zyrtari të FBI-së.

Sipas Metës, SPAK duhet të vendosë komunikim intensive me institucionet e drejtësisë në SHBA për të marrë sa më shumë informacione për të zbardhur këtë çështje.

Meta shkruan se “çdo përpjekje e Edi Ramës për t’ju shmangur përballjes me të vërtetën, përfshirë edhe hetimin parlamentar, për këtë aferë skandaloze korrupsioni është një konfirmim i fajësisë së tij dhe tentativë e dëshpëruar për t’ju fshehur llogaridhënies së pashmangshme”.

Postimi i plotë i Ilir Metës:

Përballë fakteve shokuese, që zbulohen çdo ditë, drejtësia shqiptare duhet të nisë urgjentisht hetimet për Kryeministrin e implikuar drejtpërdrejt në aferën shumë të rëndë korruptive shtetërore “Mc Gonigal”.

SPAK duhet të kishte nisur me kohë hetimet shumë të thelluara përballë këtij skandali, që e ka shndërruar institucionin e Kryeministrit në një çerdhe korrupsioni, manipulimi dhe trafikimi mafioz të influencave duke korruptuar edhe zyrtarë të lartë si Mc Gonigal.

SPAK duhet të vendosë një komunikim intensiv, serioz dhe shumë të ngushtë me institucionet e drejtësisë amerikane për të zbardhur deri në fund këtë skandal kaq të rëndë, në dritën e provave të pakundërshtueshme të zbuluara nga drejtësia amerikane.

Ky komunikim i SPAK me drejtësinë amerikane me qëllim zbardhjen e veprimtarisë antishterore dhe korruptive të Edi Ramës është një detyrim ligjor i pashmangshëm për të.

Çdo përpjekje e Edi Ramës për t’ju shmangur përballjes me të vërtetën, përfshirë edhe hetimin parlamentar, për këtë aferë skandaloze korrupsioni është një konfirmim i fajësisë së tij dhe tentativë e dëshpëruar për t’ju fshehur llogaridhënies së pashmangshme.

Asnjë shqiptar nuk mund të pranojë kurrë që të ketë një Kryeministër, zyra e të cilit është e inkriminuar deri në grykë me veprimtari të paligjshme në dëm të interesave më të larta të Shqipërisë dhe të shqiptarëve.